Universiteti i Durrësit në rrezik shembje
Shembja masive në lagjen Kodër Vile në Durrës, ka shkaktuar dëmtimin e disa shtëpive dhe një ditë më parë u rrafshua dhe një restorant në këtë zonë. Universiteti ‘Aleksandër Moisiu’, i cili frekuentohet nga 3 mijë studentë, ndodhet vetëm pak metra larg restorantit të lartpërmendur. Gjithashtu, sipas “IkubInfo”, segmenti nga Universiteti i Durrësit deri tek Currilat, është bllokuar sërish gjatë orëve të natës.
Toka në këtë zonë, sipas specialistëve, është shumë e paqëndrueshme dhe e vetmja mënyrë për të shmangur rrëshqitjet masive është pyllëzimi i saj.
Edhe në qarkun e Fierit harta e zonave të përfshira në rrëshqitje është zgjeruar edhe më shumë. Muajin e fundit në këtë qark janë shkatërruar mbi 70 shtëpi nga rrëshqitjet e tokës. Ndërkohë, në fshatin Gurë të Lushnjës, tre shtëpi janë shembur ndërsa 10 të tjera janë të pabanueshme. Deri tani për banorët nuk është ofruar asnjë ndihmë as nga komuna dhe as nga shtabi i emergjencave.
Pergatiti: Violeta Ndoj
-
Publikohet raporti përfundimtar i KSHH për zgjedhjet
-
Nëpërmjet një raporti për zgjedhjet e 28 qershorit, Komiteti Shqiptar i Helsinkit (KSHH), vlerësoi sot se në zgjedhjet parlamentare ka patur plot shkelje. Si rrjedhojë, procesi nuk plotësoi standardet ndërkombëtare.
Në raport, theksohet se në rrethe të ndryshme si Korçë, Kukës, Durrës, Fier etj, u vërejt votimi familjar, gjë që përbën shkelje të standarteve të BE, KE dhe OKB.
Kritika ka patur edhe për Komisionin Qëndror të Zgjedhjeve nga ana e Komitetit Shqiptar të Helsinkit e konkretisht për kryetarin e KQZ, Arben Ristani. Në raport thuhet se “KQZ nxitoi me shpalljen e rezultateve. Disa vendime të Ristanit ishin jo profesionale dhe politike”. Duke ju referuar dhe raportimeve të ndërmjetme të vëzhguesve ndërkombëtarë, KSHH shprehet se "krahas disa arritjeve, në drejtim të kuadrit ligjor dhe përgatitjeve paraprake tekniko-organizative, gjatë procesit u paraqitën fakte shqetësuese, qëndrime të njëanshme dhe të politizuara të KQZ-së, presione dhe ndërhyrje në veprimtarinë e komisioneve zgjedhore, vlerësime negative sidomos gjatë fazës së numërimit të votave".
Raporti përfundimtar i KSHH-së mbi ecurinë e procesit zgjedhor të 28 qershorit në Shqipëri u publikua sot.
Violeta Ndoj
»»»
