Në listën e vendeve të Ballkanit Perëndimor për liberalizimin e regjimit të vizave me vendet e Bashkimit Europian, tashmë do të jenë edhe Shqipëria me Bosnje-Hercegovinën. Sipas “Balkanweb”, Komisioni i Parlamentit Europian për Liritë Civile, Drejtësinë dhe Punët e Brendshme, ka miratuar mbrëmjen e djeshme raportin e eurodeputetes Tanja Fajon për këtë cështje. Me këtë miratim, Shqipëria dhe Bosnje-Hercegovina futen në “listën e bardhë” të Shengenit, ku tashmë ndodhen Maqedonia, Serbia dhe Mali i Zi. Për Kosovën, pritet ende që të fillojë procesi për liberalizimin e vizave. Ndërkohë, për Serbinë, Maqedoninë dhe Malin e Zi, pritet që liberalizimi i vizave të hyjë në fuqi në 1 janar të vitit 2010.
Komisioni i ka porositur edhe një herë Shqipërinë dhe Bosnje-Hercegovinën që të angazhohen për të realizuar reformat e nevojshme, për ta kualifikuar programin e heqjes së vizave, ashtu si tre vendet e tjera ballkanike.





 
   Pergatiti: Jonida Salku »»»