Basha: Greqia na mbështet për vizat
Qeveria greke e mbështet plotësisht procesin e liberalizimit të vizave për Shqipërinë. Kështu ka deklaruar sot Ministri i Brendshëm Lulzim Basha, pas firmosjes së disa marrëveshjesh bashkëpunimi në fushën e sigurisë së rendit dhe kufijve me ministrin e Mbrojtjes greke, Mihali Hristoidhis.
Ministri grek Hristoidhis deklaroi në Tiranë, se krimi i organizuar në Greqi vazhdon të ketë rritje, në përbërje të të cilit ka shqiptarë. Sipas Hristoidhis, kokat e trafikut janë grekë, por pjesa më e madhe e trafikantëve janë shqiptarë.
“Kohët e fundit është shtuar krimi në radhët e të huajve, pa përjashtuar faktin që rrjetet e fuqishme drejtohen nga grekët. Duke qenë se shqiptarët janë të huajt më të shumtë në numër në Greqi, atëherë regjistrojnë edhe numrin më të lartë të personave të përfshirë në krim”, tha Hristoidhis, i cituar nga “Top Channel”.
Pergatiti: Violeta Ndoj
-
Në pritje të miratimit të qeverisë...
-
Situata politike në Shqipëri është përqëndruar ditët e fundit në miratimin e qeverisë së re, pa përjashtuar edhe tema të tjera të shumëpërfolura si bojkoti i parlamentit nga Partia Socialiste, kriza brenda kësaj partie, zgjedhja e kreut të saj, apo cështje si përfshirja e Fatmir Mediut në qeveri dhe pushimi i gjyqit ndaj tij për akuzën mbi tagjedinë e Gërdecit. Megjithatë, cështja më e fundit dhe që pritet të mbyllet pikërisht sot, është ajo e miratimit të qeverisë së re “Berisha 2”.
15 ministrat e kësaj qeverie janë caktuar dhe propozuar pak ditë më parë nga kryeministri i saj, Sali Berisha. Pas dërgimit për dekretim në Presidencë, kreu i shtetit shqiptar Bamir Topi, dha “OK” të hënën paradite për emrat e kësaj qeverie. Ndërkohë, seanca për votëbesimin dhe miratimin e qeverisë në Kuvend, u shty për ditën e sotme. Në orën 18:00 pritet të fillojë seanca Parlamentare ku do të votëbesohen ministrat e qeverisë së re. E gjithë procedura do të marrë fund kur të 15 këto emra, së bashku me kryemistrin, të bëjnë betimin para Presidentit të Republikës së Shqipërisë.
Pergatiti: Jonida Salku
»»»
