Presidenti i Republikës së Shqipërisë Bamir Topi, i ndodhur këto ditë në Zagreb, ka zhvilluar dje një takim me nënsekretarin Amerikan të shtetit Jacob Lew. Topi gjendet në Kroaci në kuadër të pjesëmarrjes në ceremoninë e betimit të Presidentit të ri të këtij vendi, Ivo Josipovic.
Në takimin me Lew, Presidenti shqiptar vlerësoi bashkëpunimin e shkëlqyer midis Shqipërisë dhe Shteteve të Bashkuara të Amerikës, duke shrehur bindjen se marrëdhëniet do të forcohen edhe më tej në të ardhmen. “Ne u jemi mirënjohës Shteteve të Bashkuara të Amerikës për mbështetjen dhe ndihmën e gjithanshme që i kanë dhënë Shqipërisë, si në rrugën e transformimeve të brendshme demokratike e në konsolidimin e demokracisë shqiptare, ashtu edhe për angazhimin e vazhdueshëm e kontributin e madh në mbështetje të procesit të integrimit të Shqipërisë në NATO”, u shpreh Topi në këtë takim. Vec të tjerash, ai e njohu nënsekretarin amerikan me zhvillimet që ka pësuar Shqipëria kohët e fundit, duke përfshirë këtu angazhimin në NATO dhe procesin integrues në Bashkimin Europian. Topi e falenderoi Lew dhe SHBA-në për rolin që ka luajtur dhe mbështetjen që ka dhënë për shtetin e Kosovës, duke qënë se dy ditë më parë ishte dyvjetori i shpalljes së pavarësisë së këtij shteti.
Në takim u diskutua edhe mbi zhvillimet e fundit politike dhe nismën që ka marrë Topi si ndërmjetës i bisedimeve mes palëve për zgjidhjen e krizës. Lew vlerësoi rolin konstruktiv të Topit dhe angazhimin e tij për të rifilluar dialogun politik dhe për të rivendosur legjitimitetin dhe funksionimin e institucioneve demokratike.
 
 
    Pergatiti: Jonida Salku




»»»