Miratohet rezoluta për vizat

Ndër zhvillimet e seancës së djeshme paramentare, përvec debateve pozitë-opozitë, që tashmë janë bërë të zakonshme, ajo që vlen për tu theksuar ishte rënia dakort me unanimitet për votimin e rezolutës për liberalizimin e vizave. Rezoluta në fjalë i është paraqitur Kuvendit të Shqipërisë nga Grupi parlamentar demokrat. Ajo u miratua me 127 vota Pro (të gjithë deputetët e pranishëm në sallë). Edhe deputetët e Partisë Socialiste, kanë shprehur mbështetjen e tyre ndaj kësaj rezolute, edhe pse kishin kërkuar më parë që në rezolutë të përfshiheshin disa kritika të qeverisë, përfshi problemet me dokumentet e identifikimit dhe procesin e zgjedhjeve.

Sic publikon edhe “Lajmifundit”, rezoluta e liberalizimit të vizave përmban një sërë pikash të poshtëshënuara për Kuvendin.

Kuvendi i Republikës së Shqipërisë:

1. Konfirmon mbështetjen e të gjitha forcave politike të Kuvendit të Republikës së Shqipërisë në procesin e liberalizimit të vizave dhe shpreh njëzëri vendosmërinë për të përmbushur objektivin e udhëtimit pa viza në vendet Schengen.

2. Vlerëson arritjet e Shqipërisë në përmbushjen e detyrimeve të procesit të liberalizimit të vizave dhe inkurajon qeverinë e Republikës së Shqipërisë për vazhdimësinë e përpjekjeve për të konsoliduar më tej progresin tashmë të konsiderueshëm, të njohur dhe të vlerësuar nga institucionet e BE.

3. Mbështet deklaratën e përbashkët të Parlamentit Evropian dhe Këshillit datë 30 Nëntor 2009, dhe në vijim të saj miratimin e Rregullores 1244/2009, në bazë të së cilës të dy institucionet shprehen besimin që Shqipëria do të përfitojë për liberalizimin e vizave, sapo Komisioni të vlerësojë që Shqipëria i ka plotësuar detyrimet e udhërrëfyesit.

4. Përshëndet faktin që Komisioni Evropian i ka përfunduar misionet e ekspertëve dhe i bën ftesë Komisionit të respektojë kalendarin kohor për përgatitjen e raportit vlerësues, për të mundësuar propozimin legjislativ për liberalizimin e vizave në fillim të pranverës 2010, çka do t’i hapte rrugë marrjes së vendimit për liberalizimin e vizave deri më datën 1 korrik 2010.

5. Mirëpret që Parlamenti Evropian, vendet anëtare dhe Komisioni Europian të marrin në konsideratë përmbushjen e detyrimeve të udhërrëfyesit nga Shqipëria si dhe konsensusin që ekziston mes të gjitha forcave politike të Republikës së Shqipërisë lidhur me arritjen e objektivit të udhëtimit pa viza për qytetarët shqiptarë si pjesë e plotësimit të ëndrrës së tyre evropiane.

   Pergatiti: Jonida Salku