Meta, drekë pune me Bashkimin për Mesdheun

Ministri i Punëve të Jashtme, Ilir Meta, priti sot në një drekë pune ambasadorët rezidentë të vendeve anëtare të Bashkimit për Mesdheun. Dreka, sipas agjensisë “NOA”, u zhvillua në kuadër të angazhimit politik të Shqipërisë dhe projektet konkrete të këtij organizmi. Meta ka theksuar në fjalën e tij rëndësinë që vendi ynë i kushton bashkëpunimit në kuadër të BpM.

“Bashkëpunimin në kuadër të Bashkimit për Mesdheun, ne e shohim si një vlerë të shtuar të politikës sonë të jashtme dhe si pjesë komplementare të procesit tonë të integrimit”, u shpreh Meta.

Meta ka theksuar synimin e qeverisë për të dinamizuar pjesëmarrjen e Shqipërisë, vecanërisht në forumet e bashkëpunimit konkret në fushën ekonomike, të kulturës, arsimit etj.

Meta tha se: “për këtë qëllim ne kemi përgatitur një plan konkret pune, ku përfshihet edhe mundësia e organizimit në Shqipëri të ndonjë takimi ministerial në fushën e energjisë apo të kulturës”.

Ambasadori i Mbretërisë së Spanjës, Manuel Montobio, nga ana e tij tha se objektivat prioritare të Bashkimit për Mesdheun kanë të bëjnë me transformimin e ideve në realitet, për të krijuar një zonë paqeje, dialogu ndërkulturor dhe prosperiteti në Mesdhe.

Në fund të drekës së punës, bashkëbisduesit janë ndalur në objektivat që duhen arritur dhe në sfidat e bashkëpunimit në të ardhmen.

           Pergatiti:   Violeta  Ndoj