Basha, pret në takim shoqatën e bashkive

Ministri i Brendshëm Lulzim Basha, ka pritur një përfaqësi të shoqatës së bashkive, drejtuar nga Kryetari i Bashkisë së Kavajës. Në këtë takim, sipas “Balkanëeb”, Basha është shprehur se fondet për bashkitë dhe komunat janë ndarë në mënyrë të barabartë nga qeveria, pavarësisht nga forcat politike nga të cilat ato drejtohen. Basha ka kërkuar gjatë takimit prova nga të gjithë ata që pretendojnë se qeveria ka cunguar pavarësinë financiare të pushtetit vendor.

Ministri Basha ka theksuar se: “nuk më mbetet gjë tjetër vecse të përsëris vullnetin e kryeministrit Berisha për këdo që pretendon se ka një zvogëlim mund ta paraqesë me fakte dhe padyshim që qeveria do ti kompensojë. Deri më sot, përvec retorikës nuk kemi patur asnjë dëshmi të tillë dhe nuk do të kemi për sa kohë që qeveria vazhdon në mënyrë progresive në cdo situatë të ketë parësore mbajtjen e niveleve optimale të financimit tuaj dhe avancimin e tyre më tej”.

Drejtues të bashkive ku qeveris e majta, kishin lajmëruar javë më parë protesta kundër ndërhyrjes që po bën qeveria në punët e bashkive. Sipas tyre, qeveria po ndërhyn në mbledhjen e taksave si dhe në shpërndarjen e fondeve dhe granteve për përfaqësitë e pushtetit vendor në Shqipëri.

         Pergatiti:   Violeta  Ndoj