Moti vështirëson situatën në veri
Ditët e fundit, një situatë problematike ka krijuar moti i ftohtë me akull dhe reshje dëbore në veri të Shqipërisë. Zonat më në situatë të keqe janë Tropoja dhe Kukësi. Për shkak të akullit dhe borës, është bërë i vështirë kalimi në disa akse rrugore. Pavarësisht pastrimit të vazhdueshëm nga borëpastrueset, është e vështirë të kalohet në aksin kryesor rrugor Qafë Morinë-Bajram Curri-Fierzë, aks që lidh Tropojën me Kosovën. Po ashtu, e vështirë është gjendja edhe në akset Bajram Curri-Krumë, Fierzë-Qafë Mali, Morinë-Kukës-Qafë Shllak, Krumë-Kukës, Kukës-Shishtavec, Kukës-Bushtricë. Sipas të dhënave të autoriteve vendore, këto akse janë të kalueshme vetëm me zinxhirë. Mjetet e rënda janë ndaluar përkohësisht të udhëtojnë në këto zona, pasi rrezikojnë rrëshqitjen nga akulli dhe bora.
Ndërkohë, temperaturat vazhdojnë të jenë të ulëta. Ato janë regjistruar në minus 3 deri në minus 4 gradë celcius.
Pergatiti: Jonida Salku
-
Berisha: Pret në takim Camille Naumah
-
Gjatë një vizite urimi për fillimin e punës në krye të qeverisë së re, Camille Naumah, përfaqësuesja e Përhershme e Bankës Botërore në Shqipëri, i shprehu Kryeministrit Berisha sot, garancinë se Banka Botërore do ta vazhdojë bashkëpunimin me qeverinë shqiptare.
"Banka Botërore do të vazhdonte me të njëjtin përkushtim punën për përfundimin e projekteve të nisura, si dhe fillimin e projekteve të reja, konform strategjisë së saj për zhvillimin e vendit", tha Naumah.
Znj.Naumah i ofroi Kryeministrit Berisha asistencë edhe për përballimin e pasojave të tërmetit nga BB-ja në fushën e shëndetësisë, të ambientit, etj.
Nga ana e tij Kryeministri Berisha e falenderoi znj.Naumah për vizitën dhe theksoi se qeveria e tij do të vazhdojë bashkëpunimin me Bankën Botërore, në suksesin e projekteve ekzistuese, si dhe në atë të projekteve të ardhshme.
Gjatë takimit, znj. Naumah tha se Banka Botërore po bën një studim në lidhje me zhvillimet klimatike dhe situatën e burimeve ujore në Ballkan, pjesë e të cilit është edhe Shqipëria.
Përgatiti: Violeta Ndoj
»»»
